L-Onor. Omar Farrugia MP
L-Onor. Omar Farrugia, imwieled fl-1995, huwa l-iżgħar Ministru fil-Kabinett maħtur wara l-elezzjoni ġenerali tat-30 ta’ Mejju 2026. Huwa jservi bħala Ministru għaż-Żgħażagħ, il-Benesseri u l-Implimentazzjoni tal-Programm Elettorali.
L-impenn tiegħu fis-servizz pubbliku beda fl-2019, meta ġie elett Sindku tal-Imqabba fl-età ta’ 24 sena. Matul il-ħames snin li mexxa l-Kunsill Lokali, kien strumentali fit-twettiq ta’ diversi proġetti ta’ riġenerazzjoni u investiment li qabżu l-€5 miljun, fosthom ir-riġenerazzjoni tal-pjazza ewlenija tal-lokalità.
Fl-2022 ġie elett għall-ewwel darba fil-Parlament biex jirrappreżenta lill-elettorat tal-Ħames Distrett. Matul il-ħidma parlamentari tiegħu nħatar ukoll Chairman ta’ Sport Malta, fejn kompla jippromwovi inizjattivi favur l-isport u stil ta’ ħajja aktar attiv.
F’Jannar tal-2024 inħatar Segretarju Parlamentari għax-Xogħlijiet Pubbliċi. Taħt it-tmexxija tiegħu, id-Dipartiment tax-Xogħlijiet Pubbliċi wettaq numru sostanzjali ta’ proġetti ta’ tisbiħ u restawr madwar Malta u Għawdex, filwaqt li kompla jsaħħaħ il-kollaborazzjoni tiegħu mal-Kunsilli Lokali biex jitjiebu l-komunitajiet madwar il-pajjiż.
Wara li reġa’ kiseb il-fiduċja tal-elettorat fl-elezzjoni ġenerali tal-2026, Omar Farrugia nħatar Ministru għaż-Żgħażagħ, il-Benesseri u l-Implimentazzjoni tal-Programm Elettorali.
Bħala Ministru, huwa jmexxi l-ħidma tal-Gvern biex jissaħħu l-opportunitajiet għaż-żgħażagħ, titkompla l-promozzjoni tal-benesseri fil-politika pubblika u tiġi kkoordinata l-implimentazzjoni tal-miżuri tal-Programm Elettorali bejn il-Ministeri kollha tal-Gvern. Il-ħidma tiegħu hija ffukata fuq Governanza li twassal ir-riżultati, il-koordinazzjoni effettiva bejn l-entitajiet pubbliċi u t-titjib kontinwu tal-kwalità tal-ħajja taċ-ċittadini.
Omar Farrugia huwa gradwat fil-Business and Management u fil-Project Management.